09.02.2012 08:34
Ég var að lesa FRÉTTUM bjart og hressandi viðtal
við eigendur Godthaab í Nöf af tilefni 10 ára afmæli fyrirtækisins. Spjallið
ber yfirskriftina "Barnið hefur braggast vel". Barnið sem sumir töldu að ætti
eyða á "fósturstiginu" fyrir áratug síðan.
Þeir félagar nefna svæðið fyrir botni
Friðarhafnar þar sem þeir á sínum tíma sóttu um að fá byggjngarétt á en fengu höfnun. Þarna held ég að
bæjaryfirvöld hafi gert sín stærstu mistök í skipulagsmálum á seinni árum. Ég
trúi að umrætt svæði sé algjörlega kjörið til að byggja frá grunni nútíma
fiskvinnsluver sem yrði tæknilega og að öllu leiti í heimsklassa. Og ég sé
fyrir mér yfirbyggða löndunaraðstöðu sem ágengir og sídrullandi mávar fengju
ekki aðgang að.
Ég óska eigendum og starfsfólki Godthaab í
Nöf til hamingju með afmælið og
árangurinn.
07.02.2012 08:24
Fólk talar stundum um klessumálverk. Ætli málverkið á myndinni sem hér fylgir falli undir þann flokk?
05.02.2012 11:45
Nú um helgina hafa þeir hjá Laurel & Hardy verið að brjóta niður smurstöðina við Græðisbraut. Þetta hús átti sögu en kannski ekki mjög merka sögu. Byggð f.o.f. til að þjóna miklum fjölda vörubíla sem hér voru, trogbílarnir voru reyndar lengst af á síðustu öld miklu fleiri en minni einkabílar hér í Eyjum.
Eftir að Bílastöðin hætti starfsemi hefur þetta svæði verið fremur illa nýtt. Smurstöðin víkur nú fyrir nýju húsi sem mun hýsa Húsasmiðjuna.
Meðfylgjandi mynd tók ég í gær og innfelda myndin sem ég held að sé tekin árið 1958 sýnir að smurstöðin er í byggingu.
02.02.2012 14:38
Það þurfti ekki að spyrja að því, tók bara smástund selja alla miðana á tónleikana ......
31.01.2012 16:43
Nú eru fréttir af fyrirhuguðum miklum framkvæmdum við höfnina. Það er auðvitað bæði gott og gleðilegt. Geysi mikið hefur verið unnið að endurbótum á undanförnum 10 til 12 árum.
Vil benda ykkur á að í myndaalbúmi hér er ég með yfir 240 ljósmyndir sem tengjast Vestmannaeyjahöfn.
23.01.2012 08:20
Nú á víst að rífa niður húsið Sólvang við Kirkjuveg í dag. Einhver bölvuð óværa fannst í húsinu fyrir nokkru. - Mikil sorgarsaga.
Meðfylgjandi mynd tók ég 1974. Túlipanarnir voru gjöf frá hollendingum.
19.01.2012 14:38
Nýlega las ég einhver staðar um svokallaða hreyfiseðla sem gætu komið að
einhverju leiti í staðin fyrir lyfseðla. Með öðrum orðum: Meiri hreyfingu,
minna pilluát.
Þetta er auðvitað það sem flestir ættu að
vera sammála um nema þeir sem hafa beina hagsmuni af því að framleiða og selja
lyf. Þeir munu andskotans á móti.
Það er ljóst, eins og með venjulega
lyfseðla, að hreyfiseðlar virka ekki nema sé farið eftir þeim fyrirmælum sem á
honum stendur
Ég hef nokkuð lengi haft trú á ágæti og
nauðsyn hreyfingar fyrir skrokkinn ekki síst þegar árin færast yfir, (þó
árangurinn sjáist ekki glöggt á mínu sköpulagi). Fyrir u.þ.b. áratug setti ég
mér það takmark að ganga a.m.k. 5 km. á dag. Ekki hefur það nú alveg gengið
eftir nú í seinni tíð.
Það er ósköp auðvelt og notarlegt þegar úti
geysar hlandveður með skítkasti dag eftir dag að bara slaka á inni í Laisý eða
sóffanum . Hef ég þá oft og einatt gengið röskum skrefum kringum Helgafelið og
stikað Steinstaðahringinn - í huganum.
Þá kem ég að því sem mér datt í hug þegar
ég sá fyrst þetta orð "hreyfiseðlar". Það er slökunarseðlar. Því ekki? Mikið og
stöðugt stress er alvarlegt ástand ekki síður en ofþyngd og hreyfingarleysi -
ég þekki það.
16.01.2012 14:45
Þá er sem sagt komið í ljós að munurinn á svokölluðu iðnaðarsalti og matvælasali er að það fyrrnefnda er geymt utandyra. Hugsum okkur dálítinn saltbing sem er óvarinn utandyra einhver staðar við sjávarsíðuna í langan tíma. Brimsaltur fuglaskítur.
03.01.2012 11:27
Dagatal fyrir ári 2012 það þrettánda í röðinni sem Prentsm. Eyrún gefur út í samvinnu við mig er komið út. Að þessu sinni er dagatalið tileinkað útsýni af Sæfjalli á Heimaey. Ljósmyndirnar sem eru tíu í allt tók ég á tímabilinu 2002 til 2010.
01.01.2012 17:34
Óska ykkur gæfu og gengis á nýju ári með þökk fyrir það gamla.
Og ég vil óska Friðrik Ásmundssyni innilega til hamingju með fálkaorðuna. Hann á heiðurinn svo sannarlega skilið fyrir einarða baráttu sína fyrir bættu öryggi sjómanna.
29.12.2011 10:11
Einkennilega að orði komist í fréttum RÚV í morgun: "....ófærð á götum borgarinnar vegna mikils fannfergis í nótt". Þarna er verið að mínum dómi að rugla saman orðunum fannfergi sem er mikill snjór á jörðu niðri og snjókomu, ofankomu, stórhríð o.s.fr.
Annað: Fyrsta heila árið sem ég bjó hér í Eyjum var 1968. Þá, mig minnir í byrjum mars snjóaði hér mikið á einni nóttu. Meira að segja ég norðlendingurinn varð að viðurkenna að fannfergið væri meira en bara smá föl. Ég tók eftir því að menn báru sig misjafnlega að við snjómokstur. Skiptust í tvo flokka, annars vega innfæddir og hins vegar aðkomnir, aðallega að norðan. Innfæddir mokuðu snjónum með litlum malarskóflum eins og þeir væru að moka salti. Voru margir daglangt að glíma við snjódyngjuna. Hinir (að norðan) notuðu stórar skóflur og stungu snjóinn skipulega í hnausa og afköst voru mun meiri en hjá fyrrnefnda flokknum. Þetta er f.o.f. saga um muninn á reynslu og reynsluleysi
- með svolitlum "þingeyingi" í bland.
24.12.2011 13:31
Kærar jólakveðjur til ykkar sem hafið verið svo dugleg að heimsækja mig hér á síðuna.
13.12.2011 19:33
Hvaða bull er þetta eiginlega? "Hundur ók á bíl" segir í fyrirsögn (ekki)fréttar sem miðlar hafa verið að éta upp eftir hver öðrum í dag. Hundur ekur ekki bíl. Aldrei. Aftur á móti getur hundur valdið árekstri, orðið valdur að árekstri o.s.fr. Þó að hundar hér í Eyjum hafi margir mannsvit og vel það, þá hafa þeir ekki hundsvit á akstri bifreiða.
12.12.2011 12:30
Endemis rugl er þetta. Það vita allir að við eyjamenn erum löghlýðnastir og ljúfastir allra. Það gæti þó verið að einhver sannleikskorn og skýringar séu á fréttinni. Önnur er eflaust framúrskarandi vökul augu og dugnaður lögreglunnar hér í Eyjum. Hin skýringin og vísast höfuðástæða er eins og alltaf a.k.p.
